Ընդունելություն

Ինչպիսի՞ն եք պատկերացնում ձեր ապագան.

• ձեր ներկա մտածելակերպը, գիտելիքներն ու փորձառությունը բավարա՞ր են լուրջ ձեռքբերումների համար
• դուք պատրա՞ստ եք դիմագրավելու արագացող փոփոխությունների մարտահրավերներին և օգտվելու ընձեռվող նոր հնարավորություններից

Կրթության և աշխատանքի ապագայի մասին ընդունված պատկերացումները արդեն չեն գործում.

• տեխնոլոգիական զարգացումը արագանում է. եթե ձեր աշխատանքը բաժանվում է կրկնվող գործողությունների (օր.՝ հաշվապահություն, թարգմանություն), և դրա ավտոմատացումը շահավետ է բիզնես տեսանկյունից, ապա այն անխուսափելիորեն ավտոմատացվելու է
• աշխարհը բաց է. ձեր վրա ազդելու են անմիջական տեսադաշտից դուրս գտնվող և անգամ ձեր մասնագիտության հետ կապ չունեցող գործոններ օր.՝ դուք ստիպված եք լինելու մրցակցել Հնդկաստանի (աշխարհի ամենաշատ անգլախոս բնակչությամբ երկիրը), Չինաստանի և զարգացող այլ երկրների միլիոնավոր որակյալ և էժան աշխատուժ ապահովող մասնագետների հետ

Ինչպիսի՞ կրթություն է անհրաժեշտ նման պայմաններում ոչ թե պարզապես գոյատևելու, այլ լուրջ նպատակներ իրականացնելու համար.

• նպատակամետ
  Ավանդական կրթությունը նախապատրաստում է ձեզ դառնալու շարքային մասնագետ, «Առաջնորդության Զարգացման» դասընթացը նախապատրաստում է ձեզ դառնալու նոր սերնդի առաջնորդ:
• խորաթափանց
  Ձեզ հետ իրենց փորձառություններով ու տեսլականներով են կիսվում կայացած գործիչներ և մասնագետներ:
• գործնական
  Դուք հնարավորություն ունեք կիրառել ձեռք բերած նոր գիտելիքները, ինչպես նաև իրականացնել ուսանողական նախագծեր:
• կապեր ստեղծելու հնարավորությամբ
  Դուք կարող եք դառնալ ապագա ձեռքբերումների վճռականությամբ երիտասարդների համայնքի մասնակից:

Ի՞նչ է պահանջվում ձեզնից.

• գործնական ցանկություն
  Պարզապես այս տողերն ընթերցելը ու երազելը բավարար չէ. պետք է աշխատել՝ ձեր նպատակները իրականացնելու համար:
• ճկուն մտածելակերպ
  Անկանխատեսելի մարտահրավերներին դիմագրավելու և հաջողության հասնելու համար անհրաժեշտ է բաց լինել նոր գիտելիքների ու փոփոխությունների հանդեպ:
• պատասխանատվության զգացում
  Պարզապես վկայական ստանալու կամ ժամանցի անցողիկ ցանկության, ինչպես նաև առաջնորդի կերպարին անհարիր արժեհամակարգի պարագայում խնդրում ենք չդիմել ընդունելության համար:
• հրատապության գիտակցում
  Անցնող յուրաքանչյուր վայրկյան նվազեցնում է ձեր ապագա ձեռքբերումների սահմանները. գործելու ժամանակը հիմա է:

---

Ինչպե՞ս

Ընդունելության համար կարող են դիմել 18 տարեկանից բարձր բոլոր անձինք:

Դասընթացի տևողությունը մեկ տարի է.

ընդունելության քննություններ՝ օգոստոսի առաջին կեսի ընթացքում (ընդունելության քննությունները բաղկացած են 2 փուլից՝ ստեղծագործական շարադրություն և հարցազրույց)
դասեր՝ սեպտեմբեր-դեկտեմբեր	քննություններ՝ հունվար
դասեր՝ փետրվար-մայիս	քննություններ՝ մայիսի վերջ
գործնական աշխատանքներ՝ դասընթացի ողջ տևողության ընթացքում

Ուսումնական պրոցեսը բաղկացած է հետևյալ հիմնական բաժիններից.

• ինքնաճանաչում և անհատական զարգացում (օր.՝ հաղորդակցության բանավոր, գրավոր և ոչ խոսքային [body language] միջոցներ),
• առաջնորդության հիմունքներ,
• թիմային աշխատանք,
• ընդլայնված թեմաներ (օր.՝ հարաբերություններ ԶԼՄ-ների հետ, փոփոխությունների կառավարում),
• օժանդակ մոդուլներ (օր.՝ տեղեկատվության կառավարման համակարգչային գիտելիքներ, անգլերենը գործարար հաղորդակցության մեջ),
• հանդիպումներ կայացած գործիչների հետ, այցելություններ (դեսպանատներ, միջազգային ներկայացուցչություններ և տարբեր կազմակերպություններ),
• քննարկումներ, առաջնորդության թեմայով վիդեոնյութերի վերլուծություններ, թիմային խաղեր,
• գործնական աշխատանք և ուսանողական նախագծեր:

* Ավելի մանրամասն տվյալները տրամադրվում են դիմորդներին և ուսանողներին:

Ուսուցումը վճարովի է. ուսման ողջ տևողության համար այն կազմում է 200 հազար ՀՀ դրամ:
Առաջնորդության Դպրոց հիմնադրամը շահույթ չհետապնդող կազմակերպություն է. գումարը օգտագործվում է հիմնականում զարգացման նախագծերի իրականացման և դասախոսությունների հետ կապված ծախսերի համար:

2012թ. դասընթացների ընդունելության վերաբերյալ տեղեկատվությունը հասանելի կլինի 2012թ. հունիսի 1-ից:

Առաջնորդության դպրոցի նորություններին հնարավորինս շուտ տեղեկանալու համար կարող եք նաև գրանցվել մեր կայքում, կամ միանալ մեր խմբին Facebook-ում: